Mëngjesin e sotëm, ka ikur i burgosuri Lorik Xhemshiti, i cili po trajtohej në Repartin e Hematologjisë në QKUK.

Dy zyrtarë të Shërbimit Korrektues të Kosovës u pezulluan nga puna për këtë rast të arratisjes dhe ndaj tyre tashmë është iniciuar hetim.

Gazeta Sinjali ka mësuar ekskluzivisht se dy zyrtarët korrektues të pezulluar janë Bekim Bytyqi dhe Bekim Zani.

Bytyqi dhe Zani kanë qenë zyrtarët e caktuar për ta ruajtur të burgosurin që po trajtohej dhe dyshohet se ia kanë mundësuar të njëjtit arratisjen.

SHKK njoftoi se ndaj tyre ka nisur hetimi edhe nga ky institucion.

“Shërbimi Korrektues i Kosovës njofton opinionin publik se sot, rreth orës 06:30, nga Reparti i Hematologjisë në SHSKUK ka ikur i burgosuri L.Xh, i njejti ishte i akuzuar  për Vepren Penale Fajde. Lidhur me rastin janë pezulluar nga puna dy zyrtarë korrektues, ndërsa është njoftuar edhe policia. SHKK ka filluar hetimet për të zbuluar se si ka ndodhur rasti dhe do t’ju mbajë të informuar.”

Ndryshe, Kodi Penal i Republikës së Kosovës parasheh që kushdo që mundëson arratisjen e personit i cili gjendet në mbajtje në bazë të vendimit të ligjshëm mbi privimin nga liria, dënohet me burgim prej tre muaj deri në pesë vjet.

Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.