Mbrojtja e ish-presidentit të Republikës së Kosovës, Hashim Thaçi, i ka kërkuar kryetares së Gjykatës Speciale, Ekaterina Trendafilova, që të rikonsiderojë vendimin e saj me anë të së cilit hodhi poshtë kërkesën e mbrojtjes për vetëtërheqjen e saj nga detyra specifike e caktimit të panelit të Gjykatës së Apelit, i cili do të vendosë mbi ankesën e Thaçit për lirimin e përkohshëm.

Në shkresën e mbrojtjes të publikuar në faqen zyrtare të Dhomave të Specializuara të Kosovës në Hagë, thuhet se mbrojtja ka kërkuar rishqyrtim të vendimit lidhur me gjetjet e mëposhtme të tij:

“i)Se “Presidentja nuk mund të tërheq veten ose të skualifikohet nga ushtrimi i detyrave të saj sipas kërkesës së Mbrojtjes, sipas Rregullës 20 të Rregullave”;ii) Standardi për vlerësimin e pavarësisë dhe paanësisë së Presidentit është standardi subjektiv, pa marrë parasysh standardin objektiv; iii Se ishte “e paarsyeshme dhe pa meritë” të sugjerohet se deklaratat që i atribuohen Kryetares dhe Prokurorit Special në “konferencën diplomatike” mund të ndikojnë në paanësinë e Presidentit dhe Kolegjit të Apelit të Emëruar në sytë e një vëzhguesi objektiv”, thuhet në shkresë.

Si dhe është kërkuar të shqyrtohen edhe gjetjet e Trendafiloves, ku sipas saj, është “çorientuese” të thuhet se Prokurori Special bëri komunikime ex parte te kryetarja dhe se aplikimi për përjashtimin e kryetares nuk ishte në kohën e duhur, raporton “Betimi për Drejtësi”.

Ndryshe, më 24 gusht Trendafilova ka hudhur poshtë kërkesën e mbrojtjes së Hashim Thaçit, për vetëtërheqjen e saj nga detyra specifike e caktimit të panelit të Gjykatës së Apelit, i cili do të vendosë rreth kësaj ankese. Ndërsa, kërkesën mbrojtja e ish-presidentit të Republikës së Kosovës, e kishte parashtruar më 16 gusht.

Tutje, pas vendimit të saj lidhur me kërkesën e mbrojtjes, ajo kishte caktuar përbërjen e panelit që do të vendosë lidhur me ankesën e mbrojtjes së ish-presidentit Hashim Thaçi.

Kjo ankesë ishte parashtruar ndaj vendimit me anë të së cilit gjyqtari paraprak ia ka vazhduar masën e paraburgimit këtij të fundit, raporton “Betimi për Drejtësi”.

Sipas vendimit të Trendafilovës, paneli i Apelit do të përbëhet nga gjyqtarët Michèle Picard, Emilio Gatti dhe Nina Jørgensen.

Ndryshe, më 9 nëntor, në paraqitjet e tyre të para, Jakup Krasniqi e Hashim Thaçi janë deklaruar të pafajshëm për akuzat që u vihen në barrë.

Njëjtë është deklaruar edhe Veseli në paraqitjen e tij me 10 nëntor, sikurse edhe Selimi me 11 nëntor.

Aktakuza ndaj Hashim Thaçit, Kadri Veselit, Rexhep Selimit dhe Jakup Krasniqit është konfirmuar më 26 tetor 2020.

Sipas akuzës së ngritur, së paku midis marsit 1998 deri në shtator 1999, Hashim Thaçi, Kadri Veseli, Rexhep Selimi, Jakup Krasniqi dhe anëtarë të tjerë të ndërmarrjes kriminale të përbashkët kishin qëllimin e përbashkët për të siguruar dhe ushtruar kontroll mbi të gjithë Kosovën përmes metodave që përfshinin frikësimin, keqtrajtimin, ushtrimin e dhunës dhe eliminimin e paligjshëm të atyre që konsideroheshin si kundërshtarë.

“Ndër këta kundërshtarë përfshiheshin persona që ishin, ose që konsideroheshin se kishin qenë: (a) bashkëpunëtorë ose të lidhur me forca, zyrtarë ose institucione shtetërore të RFJ-së, ose që (b) ndryshe nuk mbështetnin qëllimet ose metodat e UÇK-së dhe më vonë të QPK-së, ndër të cilët persona të lidhur me LDK-në dhe serbë, romë dhe persona të kombësive të tjera (bashkërisht, ‘kundërshtarët’). Ky qëllim i përbashkët përfshinte krimet e përndjekjes, burgosjes, arrestimit dhe ndalimit arbitrar ose të paligjshëm, akte të tjera çnjerëzore, trajtimin mizor, torturën, vrasjen dhe zhdukjen me forcë të personave”, thuhet në aktakuzë.

Tutje, në aktakuzë përmenden edhe Azem Syla, Lahi Brahimaj, Fatmir Limaj, Sylejman Selimi, Rrustem Mustafa, Shukri Buja, Latif Gashi dhe Sabit Geci.

“Ndër anëtarët e tjerë të ndërmarrjes kriminale të përbashkët ishin Azem SYLA, Lahi BRAHIMAJ, Fatmir LIMAJ, Sylejman SELIMI, Rrustem MUSTAFA, Shukri BUJA, Latif GASHI dhe Sabit GECI, si dhe disa udhëheqës të tjerë politikë dhe ushtarakë të UÇK-së dhe QPK-së, ndër të cilët edhe anëtarë të tjerë të Shtabit të Përgjithshëm; ministra dhe zëvendësministra të QPK-së; komandantë të zonave të UÇK-së, zëvendëskomandantë të zonave dhe anëtarë të tjerë të shtabeve të komandave të zonave; komandantë të brigadave dhe njësiteve; komandantë dhe anëtarë të shërbimeve policore dhe të zbulimit të UÇK-së dhe QPK-së; ushtarë të tjerë të UÇK-së dhe zyrtarë të tjerë të QPK-së; si dhe të tjerë që vepronin në emër të UÇK-së dhe QPK-së (së bashku me Hashim THAÇIN, Kadri VESELIN, Rexhep SELIMIN dhe Jakup KRASNIQIN, bashkërisht, ‘anëtarët e NKP-së’). Të gjithë këta individë, me veprimet dhe mosveprimet e tyre, kontribuan në arritjen e qëllimit të përbashkët. Si alternativë, disa ose të gjithë këta individë nuk ishin anëtarë të ndërmarrjes kriminale të përbashkët, por u përdorën nga anëtarë të ndërmarrjes kriminale të përbashkët për të kryer krime për realizimin e qëllimit të përbashkët (së bashku me anëtarët e NKP-së, bashkërisht ‘anëtarët dhe instrumentet e NKP-së’)”, thotë akti akuzues. /BetimipërDrejtësi

Shënim: Personat e përmendur në këtë artikull konsiderohen të pafajshëm, përveç nëse nga gjykata vërtetohet se janë fajtorë me vendim të formës së prerë.