Komuna e Malishevës, të martën, ka njoftuar se në territorin e saj sivjet janë regjistruar dy raste të thumbimit nga rriqrat, por se nuk ka të infektuar me virusin e Etheve Hemorragjike Krime Kongo (EHKK). Në të njëjtën kohë është theksuar se janë duke u ndërmarrë masat për luftimin dhe parandalimin e EHKK-së, derisa drejtuesit e Institutit Rajonal të Shëndetit Publik (IRSHP) në Prizren kanë bërë të ditur se do të monitorojnë situatën dhe do të ofrojnë përkrahjen e duhur për autoritetet komunale në këtë drejtim.