Gjykata Themelore e Prizrenit, ka caktuar masën e paraburgimit, në kohëzgjatje prej 1 (një) muaji, ndaj të pandehurve me iniciale R.G. nga fshati Zhur, Komuna e Prizrenit, për shkak të dyshimit të bazuar se ka kryer veprën penale, zjarrvënia, D.H. ,D.B. dhe M.R., që të tre nga fshati  Zhur, Komuna e Prizrenit, për shkak të dyshimit të bazuar se në bashkëkryerje, kanë kryer veprën penale lëndimi i lehtë trupor.

Masa e paraburgimit do të llogaritet prej datës së arrestimit, 13.09.2019, nga ora 04:30, dhe do të zgjasë deri më datën 13.10.2019.

Në arsyetimin e lëndës, thuhet se me datë 13.09.2019, në fshatin Zhur, saktësisht në hapësirat e lokalit “Kobra City” i cili gjendet në magjistralen Prizren-Vërmicë, të pandehurit për shkak të mosmarrëveshjeve paraprake, pasi që fillimisht fjalosen më pas të pandehurit në bashkëpunim dhe koordinim të veprimeve në mes veti e sulmojnë duke e goditur me grusht nëpër pjesë të ndryshme të kokës dhe trupit për shkak se i dëmtuari me iniciale R.G., kishte thyer një shishe të birrës për dysheme në restorant, të cilit i shkaktojnë lëndime të lehta trupore në kokë dhe pjesë të ndryshme të trupit si pasojë e të cilave i dëmtuari ka kërkuar trajtim mjekësor në Spitalin Rajonal në Prizren.

Ndërsa i pandehuri me iniciale R.G. nga fshati Zhur, Komuna e Prizrenit, me datë dhe kohë të njëjtë si më lartë, për shkak të mosmarrëveshjeve paraprake dhe përleshjeve me të pandehurit e lartcekur me dashje si dhe me qëllim të dëmtimit të pasurisë së personit tjetër, ditën kritike i njëjti në garazhin e shtëpisë së të pandehurit me iniciale D.H., i vë zjarrin me lëndën djegëse benzinë, veturës të tipit Mercedes, motoçikletës të tipit Harli, duke shkaktuar dëme të konsiderueshme materiale, kurse a do të argumentohen këto fakte do të vlerësohet në fazat e mëtejme të procedurës penale.