Ka dështuar të mbahet seanca e shqyrtimit të dytë, e paraparë për të enjten në Gjykatën Themelore të Prizrenit, ndaj ish-analistit të kredive, Dritan Syla, i cili po akuzohet për keqpërdorim të detyrës zyrtare.

Syla, akuzohet se në cilësinë e zyrtarit në institucionin mikro-financiar “Qelim Kosovë”, duke shfrytëzuar detyrën apo autoritetin zyrtar, e fut të dëmtuarin Bashkim Sefa, si garantues kreditor, i cili nuk ka qenë fare prezent dhe pa e shprehur vullnetin e tij, duke i shkaktuar dëm të konsiderueshëm, raporton “Betimi për Drejtësi”.

Kryetari i trupit gjykues, gjykatësi Xheladin Osmani, ka thënë se sipas njoftimit të mbrojtësit të të akuzuarit Syla, avokatit Ethem Rugova, klienti i tij gjendet në spital për shkak të problemeve shëndetësore, dhe se ai nuk mund të merr pjesë në këtë seancë.

Duke mos pasur kushte për mbajtjen e këtij gjykimi, gjykatësi Osmani, ka thënë se seanca e radhës do të caktohet, në bazë të marrjes së informacionit lidhur me gjendjen shëndetësore të të akuzuarit Syla.

Ndryshe, ky rast fillimisht është iniciuar në Prokurorinë Themelore të Gjakovës, mirëpo kjo prokurori për t’i ikur konflikt të interesit, ka kërkuar përjashtim nga rasti, pasi që i akuzuari Syla, rezulton të jetë i djali i prokurores Mone Syla, dhe për këtë Prokuroria e Apelit, ka vendosur që rasti t’i delegohet Prokurorisë së Prizrenit.

Sipas aktakuzës së Prokurorisë Themelore të Prizrenit, të ngritur më 20 dhjetor 2018, Dritan Syla, akuzohet se në cilësinë e analistit të kredive, në institucionin mikro-financiar “Qelim Kosovë”, në Gjakovë, jashtë detyrave dhe përgjegjësive të përshkruara në kontratë, pa leje dhe dijeninë e të dëmtuarit Bashkim Sefa, atë e vendos si garantues të kredisë.

Organi i akuzës, thotë se gjatë muajit maj 2018, i akuzuari Syla, gjatë përgatitjes së dokumentacionit për marrje të kredisë 1500 euro, për klientin Dan Sefa, e vendos në dokumentacion të dëmtuarin Bashkim Sefa, si garantues i kredisë, megjithëse ai nuk ka qenë fare prezent, për të shprehur vullnetin e tij për një gjë të tillë.

Sipas aktakuzës, të dëmtuarit i shkakton dëm të konsiderueshëm, pasi që më vonë, të njëjtit i është mohuar të marrë kredi për arsye se në regjistrin e Bankës Qendrore të Kosovës (BQK), ai figuron si debitor i keq.

Me këtë, ka kryer veprën penale “keqpërdorim i pozitës apo autoritetit zyrtar” nga neni 422 paragrafi 1 të Kodit Penal të Republikës së Kosovës. /BetimipërDrejtësi