Prizren: I riu kapet me armë zjarri e municion në veturë, dërgohet në mbajtje
Posedimi i armëve të zjarrit është shndërruar në një dukuri negative, pasi që përpos që është e kundërligjshme, po cenohet edhe siguria e qytetarëve. Policia vazhdimisht gjatë kontrolleve has në persona që posedojnë armë, raporton Gazeta Sinjali.
Një rast i tillë është zbuluar mbrëmë në rrugën ‘Ibrahim Rugova’ në Prizren, pasi një njësi policore që po patrullonte në atë zonë ka ndalur për kontroll një veturë.
Burimet e Gazetës Sinjali brenda Prokurorisë kanë bërë me dije se gjatë kontrollit, te shoferi është gjetur një armë zjarri me karikator dhe fishekë.
Lexo edhe:
Video: Prizren/ Dy anët kundërthënëse të Komunës në projekte
Arma dhe municioni janë sekuestruar, ndërsa i riu është shoqëruar në stacion policor për intervistim.
Pas përfundimit të procedurave policore, Prokurori i Shtetit ka urdhëruar që 27-vjeçari të ndalohet si i dyshuar për ‘Mbajtje në pronësi, kontroll ose posedim të paautorizuar të armës’.
Ndryshe, “Kushdo që mban në pronësi, kontrollon ose posedon armë në kundërshtim me ligjin e zbatueshëm lidhur me armë të tilla, dënohet me gjobë deri në shtatëmijë e pesëqind (7.500) Euro ose me burgim deri në pesë (5) vjet.“