Ai u nda nga jeta, sot në moshën 67-vjeçare. Gjatë jetës së tij, Bajram Idrizaj dha një kontribut të çmuar në edukimin e gjeneratave të shumta si mësues në fshatrat e Hasit: Kushnin, Romajë dhe Lukijë, shkruan Gazeta e Prizrenit.

Ishte i palodhur, i përkushtuar dhe gjithmonë i rregullt në procesin mësimor. Ai qëndroi i paepur edhe gjatë kohës së pushtimit serb, duke vazhduar mësimdhënien në kushte të vështira, përballë kontrolleve të vazhdueshme nga policia e ushtria serbe, si dhe pagesave simbolike gjatë viteve të 90-ta.

Lajmi për ndarjen e tij nga jeta ka pikëlluar ish-kolegë, nxënës dhe klerikë të rajonit të Hasit, të cilët kanë shprehur respektin dhe kujtimet e tyre për mësuesin Bajram përmes publikimeve të shumta në rrjetet sociale.

Varrimi i të ndjerit do të bëhet të martën, në varrezat e Prizrenit.

Kujtimi për të do të mbetet gjithmonë i gjallë në zemrat e nxënësve, kolegëve dhe gjithë atyre që e njohën.

Ngushëllimet më të sinqerta familjes Idrizaj, të afërmve, miqve dhe gjithë atyre që e njohën! Mësuesi Bajram u prehtë në paqe!

/ Gazeta e Prizrenit /