Pesë organizata të shoqërisë civile, të premtën në Prizren kanë organizuar konferencën për media, në të cilen janë shpalosur gjetjet që janë hasur nga organizatat në procesin tenderues të projektit “ Ndërtimi i Pishinës Olimpike në Prizren.

Në fillim të konferencës, Erolina Morina nga organizata ISDY, tha se raporti i përgatitur nga organizatat: Avoko, Ec ma ndryshe, ISDY, KDI dhe PRAK konstaton se komuna e Prizrenit ka bërë disa shkelje procedurale gjatë nënshkrimit të kontratës por dhe menaxhimin e saj pasi që ajo ka ushëhequr me procedurat e prokurimit. Grupi monitorues ka gjetur shkelje në fazën e parë të prokurimit, në procesin e vlerësimit të ofertave, por edhe menaxhimin e kontratës.

Këto lëshime të bëra nga autoriteti kontraktues rrezikojnë që të kemi një projekt që nuk i plotëson kriteret dhe standartet e parapara në kontratë, theksoi ajo. Ndërkaq, rreth konkluzionit të raportit ka folur Edona Muqaj nga organizata PRAK, e cila tha se , tenderi ishte hapur në qershor të vitit 2017 në kohën e qeverisjes Muja, ndërsa për shkak të ankesave në këtë proces, nënshkrimi i kontratës është bërë 10 muaj me vonesë me fillimin e qeverisjes Haskuka.

Fati i këtij tenderi është vendosur nga një referencë për ndërtimin e një pishine e ofruar si dëshmi nga operatori ekonomik fitues. Operatorët tjerë që nuk e kanë fituar tenderin pretendojnë se kjo dëshmi ishte fiktive, dhe është gjë e mirë që Prokuroria e Prizrenit ka nisur hetime për këtë tender për të qartësuar nëse kjo ofertë ishte fiktive ose jo. Në emër të këtyre organizatave, Anesa Berisha nga KDI, ka thënë se i rekomandojmë komunës së Prizrenit që në prokurimet e ardhshme të respektohen afatet kohore të përcaktuara me ligj, si dhe t’i kushtohet rëndësi procesit të vlerësimit të ofertave.

Lidhur me çështjen në fjalë ne kemi kontaktuar zëdhënësen e Prokurorisë Themelore në Prizren, Fitore Mehmeti-Sejrani, e cila na është përgjigjur përmes postës elektronike se: “Lidhur me rastin, të cilit ju i referoheni, ju njoftojmë se Prokuroria Themelore në Prizren – Departamenti i Përgjithshëm, me datë 17.04.2019 ka ngritur aktakuzë kundër S.D., për shkak të dyshimit të bazuar se i njëjti ka kryer veprat penale “Falsifikimi i dokumenteve” nga neni 398 dhe “Legalizimi i përmbajtjes së rreme” nga neni 403 të Kodit Penal të Republikës së Kosovës (KPRK)”, ka shkruaj ajo.

Ndryshe, punimet në ndërtimin e kësaj pishine kanë filluar me një solemnitet me 20 korrik të vitit të kaluar me vendosjen e gurthemelit nga ministri në detyrë i Kulturës, Rinisë dhe Sportit, Kujtim Gashi dhe kryetari i komunës, Mytaher Haskuka.

Dinamika e paraparë për realizimin e projektit në vlerë 2. 5 milionë euro është 36 muaj, ndërsa punimet nuk janë duke u zhvilluar prej disa kohësh./tvprizreni