Adnan Merovci në emisioni “Dossier D” me Fidan Ramën në RTV Dukagjini ka rrëfyer një prej ngjarjeve më dramatike të luftës, arrestimi i Ibrahim Rugovës në Prishtinë nga policia dhe ushtria serbe.

Merovci rrëfen se me 21 mars 1999 ai bashkë me Rugovën janë kthyer në Kosovë përmes Shkupit edhe pse një gjë të tillë miqtë evropianë nuk ua kishin rekomanduar, pasi tre ditë më pas filluan bombardimet ndaj Serbisë.

Ish-shoqëruesi i Presidentit Rugova thotë se Rugova i kishte dhënë atij leje të largohet, por vendimi i Merovcit kishte qenë ndryshe.

“Rugova më tha: ‘Adnan, ti ke qëndruar me mua për dhjetë vite, por këto janë kohëra të vështira, ke obligime familjare, je i lirë dhe mund të largohesh. Si po veprojnë të tjerët veproni edhe ju’”, tha ai, përcjell Telegrafi.

Merovci me tej rrëfen se ai kishte vendosur të qëndrojë, por i kishte kërkuar Rugovës të shkojë në shtëpi të tij, gjë që Rugova e kishte pranuar.

“Më 31 mars është pushtuar shtëpia e Rugovës. Ka qenë një katrahurë. Ishte shumë vështirë. Serbët kishin ardhur nga mesdita, dhe takimi i Rugovës me Millosheviqin kishte ndodhur të nesërmen”.

“Kishim dy alternative, takimin me Millosheviqin ose vetëvrasjen. Por edhe vetëvrasja ishte e vështirë. Si të vrasësh vetën?!”, tregon Merovci./Telegrafi/