Në ekzekutivin lokal të Prizrenit, të drejtuar nga kryetari Mytaher Haskuka paralajmërohet ndryshim, në njërin ndër sektorët më të rëndësishëm të qeverisjes.

Sipas burimeve të portalit “GazetaePrizrenit”,  fjala është për sektorin e Kadastrit dhe Gjeodezisë.

“Pritet që të hënën në krye të këtij sektori të vije një persona nga Malisheva”, tha për “Gazetën e Prizrenit” një burim i besueshëm me kusht anonimiteti.

Në anën tjetër, në një postim në “facebook”, anëtari i Kuvendit Komunal nga AAK, Ilir Baldedaj, ka shkruar se Alban Krasniqi, burri i ministres së Drejtësisë, Albulena Haxhiu, së shpejti pritet të emërohet në pozitën e drejtorit të Gjeodezisë dhe Kadastrit në Prizren.

Nëse do të ndodh ky ndryshim, atëherë nuk dihet nëse drejtoresha e deritashme për KGJ, Nora Kelmendi që u mor nga Prishtina, do të vazhdojë si pjesë kabinetit të Haskukës në ndonjë sektor tjetër, apo do të largohet.

Që nga qeverisja e Haskukës së VV-së, prej 3 vjet e gjysmë, në njërin nga sektorët më të rëndësishëm komunal, në Drejtorinë për Gjeodezi dhe Kadastër janë emëruar tre drejtorë, njëri prej të cilëve, Refik Shaqiri nga partia e komunitetit boshnjak NDS, është tërhequr pas ngritjes së aktakuzës për veprën penale “Keqpërdorim i pozitës apo autoriteti zyrtar”.

Pas tij këtë sektor e ka drejtor Bajrush Sezairi,  që më pas është zëvendësuar nga Kelmendi.

Në anën tjetër, opozita e ka kritikuar Haskukën se në mungesë të kuadrove është përballur me sfida në rekrutimin e stafit, duke marrë kuadro të Vetëvendosjes jashtë  Prizrenit. /GazetaePrizrenit.net /