30-05-2024

Ky është vendimi i Apelit ndaj ankesës së “Burdushit” për shtyrjen e vuajtjes së dënimit

Gjykata e Apelit e ka refuzuar ankesën e Hysri Peqanit i njohur si “Burdushi”, kundër vendimit të kryetares së Gjykatës Themelore në Prishtinë, me të cilin kishte refuzuar kërkesën për shtyrje të ekzekutimit të dënimit prej 4 vite e gjashtë muaj burgim.

“Refuzohet, si e pabazuar ankesa e të dënuarit Hysri Peqani nga Prizreni, për shtyrjen e ekzekutimit të vuajtjes së dënimit me burg, ndërsa aktvendimi i Gjykatës Themelore në Prishtinë ED.nr981/23, i datës 12.09.2023, vërtetohet”, thuhet në vendim.

Kryetari i Apelit, Valon Totaj, ka refuzuar kërkesën me arsyetimin se pretendimet e “Burdushit”, se është i sëmurë dhe në gjendje të rëndë shëndetësore, nuk janë të mjaftueshme për shtyrje të dënimit, raporton “Betimi për Drejtësi”.

“Në rastin konkret nga shkresat e lëndës, respektivisht nga Raporti mjekësor i datës 15.09.2023, nuk është vërtetuar se i dënuari vuan nga ndonjë sëmundje e rëndë akute e cila edhe do të përbënë bazë për shtyre të ekzekutimit të dënimit”, thuhet në arsyetimin  e vendimit.

Po ashtu, në vendim thuhet se “i dënuari në rast të ndonjë komplikimi mund të marrë kujdesin e duhur dhe pa pagesë gjatë qëndrimit në burg”.

Mbrojtja e Hysri Peqanit i njohur si “Burdushi”, kishte kërkuar shtyrjen e vuajtjes së dënimit me burg për 6 deri në 12 muaj.

Hysri Peqani më 10  janar 2023 ishte dënuar me 4 vjet e 6 muaj burgim, 42 mijë euro gjobë dhe ishte urdhëruar konfiskimi i pasurisë në vlerë mbi 2 milionë euro.

Këtë vendim, Gjykata e Apelit e kishte vërtetuar më 5 qershor 2023 për veprat penale: “Ushtrim të kundërligjshëm të veprimtarisë mjekësore ose farmaceutike”, “Mashtrim”, “Shpëlarje parash” dhe “Armëmbajtje pa leje”.

Procesi gjyqësor ndaj Burdushit ka zgjatur 2 vjet e 2 muaj, ndërsa aktakuza ishte ngritur më 15 shtator 2020.

Në çështjen penale ndaj tij ishin dëgjuar një sërë dëshmitarësh, dëshmitë e të cilëve ishin ndaluar të publikoheshin deri në përfundimin e gjykimit. /BetimipërDrejtësi

Asnjë koment

Comments are closed.