Dy persona janë arrestuar në pikën kufitare në Vërmicë nën dyshimin se kanë kryer veprat “lëshim i çeqeve pa mbulesë” dhe “keqpërdorim i kartelave bankare”.

Sipas njoftimit në raportin 24-orësh të Policisë, të hënën në këtë pikë kufitare janë arrestuar një shqiptar dhe një serb që dyshohet se kishin përfituar materialisht në mënyrë të kundërligjshme.

Atyre u janë sekuestruar një veturë dhe dy telefona, ndërsa me vendim të prokurorit janë dërguar në mbajtje.

Ky është njoftimi i policisë:

PKK Vërmicë 06.05.2019-15:00. Me 06.05.2019 nën dyshimin se kanë kryer veprat e cekura janë arrestuar dy të dyshuar meshkuj njëri shqiptar dhe tjetri serb të cilët duke keqpërdorur kartela bankare kanë përfituar materialisht në mënyrë të kundërligjshme.

Nga të dyshuarit në cilësi të provave materiale janë sekuestruar një veturë dhe dy telefona celularë, kurse me vendim të prokurorit, të njëjtit pas intervistimit janë dërguar në mbajtje.