Katër persona janë arrestuar për shkak të sulmit ndaj dy shqiptarëve që ndodhi në qytetin serb të Novi Sadit mes natës së shtunë dhe të diel, ka njoftuar ministri serb i Punëve të Brendshme, Nebojsha Stefanoviq.

“Policia, pas një hetimi intensiv një disa shtigje, ka identifikuar të gjithë sulmuesit që rrahën dy të rinj dhe ka arrestuar katër persona të dyshuar për këtë vepër penale. Janë gjetur edhe rrobat që i kishin të veshura të dyshuarit të dielën në mëngjes me rastin e sulmit, që është e rëndësishme për vazhdim të hetimeve”, tha ministri serb, raporton “Blic”, transmeton Koha.net.

“Edhe pse hetimi i deritanishëm, duke përfshirë edhe bisedat me të dyshuarit, por edhe me një prej viktimave, tregon se ky incident nuk është kryer në baza etnike, Policia do t’i shqyrtojë të gjitha akuzat në detaje dhe do të vijë deri tek e vërteta e plotë”, shtoi ministri Stefanoviq.

Kujtojmë se dy të rinjtë shqiptarë,  të cilët janë rrahur brutalisht në Novi Sad të Serbisë, vetëm pse janë dëgjuar të flasin shqip, është njoftuar se janë nga rajoni i Hasit të Prizrenit,  njëri prej të cilëve më rënd, Çlirim Maloku, 19 vjeçar, nga fshati Planejë, por me banim në lagjen Arbana të Prizrenit. Ata punonin si furrtar në këtë qytet./GazetaePrizrenit.net/