Lideri serb Milorad Dodik si zakonisht prapë vazhdon me pretendimet që në Srebrenicë nuk ka ndodhur gjenocidi që “pretendohet” sipas tij.

Dodik tha në një paraqitje në televizionin serb Happy se “më 11 korrik nuk ka pasur asnjë operacion në Srebrenicë, se askush nuk ka vdekur e nuk është vrarë dhe se ‘ata’ e përkujtojnë atë datë”.

Ai shtoi gjithashtu deklaratën skandaloze se “çdo kush që vdiq, vdiq jashtë Srebrenicës”.

“Kjo është arsyeja pse disa nga njerëzit tanë në Srebrenicë nisën një iniciativë për të ndryshuar emrin e komunës në mënyrë që ajo të mos quhet Srebrenicë, por t’i jepet një emër tjetër”, tha Dodik.

Ai më pas bëri pretendime më fyese, duke thënë se “Evropa ka një problem serioz me myslimanët”, duke thënë se gjatë qëndrimit në Paris ka parë “psikozë frike se diçka do të ndodhë gjatë Olimpiadës, të cilën nuk e ka ndjerë gjatë luftës në këtë zonë”.

“Psikoza është e padurueshme dhe ata donin ta mbulonin”, tha Dodik dhe shtoi se “rezoluta nuk do të sjellë asgjë, ajo vetëm do të ndryshojë marrëdhëniet e RS ndaj BeH”. Ai theksoi gjithashtu se “askush nuk vdiq nga retorika e tij”.

Kujtojmë se 8372 persona janë vrarë vetëm gjatë disa ditëve të korrikut të vitit 1995 në Srebrenicë. Numri i viktimave në Bosnje ka qenë shumë më i madh – mbi 100 mijë të vrarë.

Ndryshe, krimi u njoh si gjenocid nga Gjykata Ndërkombëtare e Drejtësisë në Hagë në vitin 2007. /GS