Mungesa e të akuzuarit për kanosje, Ferit Selmani, ka bërë që të dështojë seanca e paraparë për të enjten, në Gjykatën Themelore në Prizren, dega në Dragash.

Gjykatësi Bekri Vehapi, ka deklaruar se për të pandehurin Selmani nuk ka fakte se është i ftuar në mënyrë të rregullt, pasi që siç shihet nga shkresat e lëndës, ai jeton jashtë vendit.

Për shkak të mungesës së kushteve ligjore, gjyqtari Vehapi, seancën e së enjtes e ka shtyrë për kohë të pacaktuar.

Sipas aktakuzës së ngritur më 15 tetor 2019, nga Prokuroria Themelore në Prizren, Ferit Selmani akuzohet se me 14 gusht 2018, rreth orës 11:30, në fshatin Vranisht, me qellim të frikësimit dhe shkaktimit të ankthit, seriozisht e kanos të dëmtuarin Rejhan Selmani.

Sipas aktit akuzues, pas një mosmarrëveshje pronësore që kishin mes vete, derisa i dëmtuari kishte qene duke rregulluar një rrënojë në pronën e tij, i pandehuri shkon aty, fillimisht bën një fotografi dhe pastaj i dëmtuari i thotë “fotografo pronën, e jo neve” .

Prokuroria pretendon se në atë moment i pandehuri e kanos atë me fjalët “mos se ta heq kokën me ketë sëpatë, e pastaj mbesin fëmijët e tu jetim”,  me ç’ rast tek i dëmtuari ka shkaktuar ankth dhe pasiguri për jetën e tij.

Me këto veprime, ai akuzohet të ketë kryer veprën penale “kanosje”, nga neni 185, paragrafi 4 e Kodit Penal të Kosovës. /Betimipërdrejtësi