Edhe një lojtar largohet nga Kombëtarja e Kosovës
![](https://i0.wp.com/www.gazetaexpress.com/wp-content/uploads/2023/10/DDD-600x360.jpeg?resize=458%2C275&ssl=1)
Pak kohë më parë “Dardanët” mbetën pa Arbnor Mujën dhe Mirlind Dakun, të cilët, për shkak të pakënaqësive, preferuan t’i bashkohen Kombëtares shqiptare.
I pari nuk po merrte ftesë nga Kosova A, e i dyti nuk po ftohej qe një kohë, përkundër pritjes.
E tash, Federata e Futbollit të Kosovës është “zënë në gjumë” përsëri, shkruan “Gazeta Express”.
Në fakt, njëri prej talentëve të së ardhmes i “Dardanëve”, Dion Berisha vendosi t’i thotë “po” Kombëtares U-21 të Shqipërisë.
Pakujdesia e shtëpisë së futbollit kosovar bëri që ta humbasë edhe një lojtar që ka mundur të ishte pjesë e rëndësishme e ekipit A të Kosovës.
Në fakt, sot selektori i Kombëtares U-21 të Shqipërisë, Alban Bushi e shpalli listën e 24 emrave të ftuar për dy ndeshjes kualifikuese të Euro 2025 ndaj Finlandës dhe Malit të Zi.
![](https://i0.wp.com/www.gazetaexpress.com/wp-content/uploads/2023/10/Lista-1-1000x562.jpg?resize=1000%2C562&ssl=1)
Dhe, në mesin e të ftuarve shihet edhe emri i talentit të Bayrn Munich II, Dion Berisha.
“Nuk mungojnë risitë në listën e Kombëtares U-21, teksa për herë të parë trajneri Alban Bushi e ka ftuar portierin Brajan Lenja nga skuadra e Luzit, mbrojtësin Brayan Boci (Lecco – Serie B), mesfushorin Enis Shabani nga skuadra gjermane, Mainz 05 II dhe sulmuesin Dion Berisha (Bayern II)”, shkruan në njoftimin e FSHF-së.
Dion Berisha ka qenë pjesë e Kombëtares U-21 të Kosovës, ndërsa për herë të fundit ka luajtur me “Dardanët e rinj” muajin e kaluar kundër Polonisë.
![](https://i0.wp.com/www.gazetaexpress.com/wp-content/uploads/2023/10/Bayerni-1000x562.jpg?resize=1000%2C562&ssl=1)
Ai është pjesë e Bayern Munich II, me të cilin ka nënshkruar në verën e këtij viti, ndërsa i ka zhvilluar 11 ndeshje dhe i ka realizuar 5 gola me këtë ekip.