20-11-2026

Erërat e fuqishme shkaktojnë dëme në Prizren dhe rajon, disa zona mbesin pa energji elektrike

Erërat e fuqishme që përfshinë Prizrenin dhe pjesë të tjera të Kosovës gjatë mbrëmjes së së enjtes shkaktuan dëme materiale në disa zona të rajonit. Në disa lokalitete, përfshirë Hasin dhe zona të tjera, pati edhe ndërprerje të energjisë elektrike, raporton Gazeta e Prizrenit.

Sipas KEDS-it, dëmet në infrastrukturën energjetike dhe avaritë e shkaktuara nga erërat e forta e bënë të domosdoshëm intervenimin e ekipeve në terren. Zyrtari i kompanisë, Adlum Ramadani, ka bërë të ditur se qindra ekipe janë angazhuar për sanimin e defekteve dhe rikthimin e furnizimit me energji elektrike.

   

Ai ka përmendur edhe Prizrenin si njërën nga komunat ku janë vërejtur pasoja në rrjetin elektrik.

Probleme pati edhe në komunën e Rahovecit, konkretisht në Krushë të Madhe, ku erërat dëmtuan kulmin e një biznesi. Pjesë të kulmit, përfshirë llamarinat, përfunduan në rrugën Gjakovë–Prizren, duke rrezikuar sigurinë e qarkullimit. Ekipet e zjarrfikësve intervenuan për largimin e tyre nga rruga.

Ndërkohë, në zonën e Shadërvanit në Prizren, erërat e forta dëmtuan dhe rrëzuan tavolinat e karriget e lokaleve të gastronomisë.

Në Prizren janë evidentuar gjithashtu probleme në rrjetin elektrik, si pasojë e kushteve të pafavorshme atmosferike.

Instituti Hidrometeorologjik i Kosovës kishte paralajmëruar erëra me shpejtësi prej 30 deri në 45 kilometra në orë, me rafale edhe më të fuqishme. / Gazeta e Prizrenit /

Asnjë koment

Comments are closed.