Garë e nxehtë pritet të zhvillohet në zgjedhjet lokale në qytetin e Prizrenit. Disa nga partitë tanimë i kanë zyrtarizuar kandidatët e tyre për kryetarë të komunës, ndërsa disa tjera janë në fazën e diskutimeve.

Vetëvendosje, e cila qeverisë më Prizrenin ende nuk e ka ndarë mëndjen se me cilin kandidat do të synoj të vazhdoj qeverisjen për një mandat tjetër.

Mirëpo, janë së paku tre emra që po shihen si opsion nga ky subjekt. Kryetari aktual, Mytaher Haskuka, Hajrullah Çeku dhe Drita Millaku. Madje, kjo e fundit ka shprehur gatishmërinë e saj për të qenë kandidate për kryetare të kësaj komune nga partia e Albin Kurtit.

“Indeksonline”, ka provuar të marrë një qëndrim nga Haskuka dhe Çeku, por ata nuk i janë përgjigjur interesimit të mediumit.

Në anën tjetër, PDK ka zyrtarizuar Shaqir Totajn për kryetar.

Pak më e komplikuar duket të jetë puna në LDK. Emrat si Driton Selmanaj dhe Anton Quni janë përmendur si mundësi për të synuar drejtimin e këtij qyteti.

Deputeti i LDK-së, Driton Selmanaj ka thënë për “Indekonline” se në një fazë të mëvonshme do ta jap vlerësimin dhe gatishmërinë për të qenë osë jo kandidat për kryetar të qytetit të dytë më të madh në Kosovë.

“Nuk e kam mëndu seriozisht nëse mund të jem kandidat për kryetar të Prizrenit. Kur të fillojnë diskutimet serioze brenda degës, atëherë e jap edhe vlerësimin tim dhe gatishmërinë time për të hyrë ose jo. Aktualisht nuk kam ndonjë mendim konkret”, ka thënë Selmanaj për Indeksonline”.

Nisma Socialdemokrate do të rikandidoj Zafir Berishën për kryetar, ndërsa Lulzim Kabashi nga AAK në Prizren ka qenë i paqashëm.

Brenda pak ditëve pritet edhe të dekretohet data kur do të mbahen zgjedhjet lokale.