Haskuka vizitoi njërin nga blegtorët përfitues të stallave për lopë qumështore

Kryetari i Komunës së Prizrenit, Mytaher Haskuka dhe drejtori i Drejtorisë së Bujqësisë dhe Zhvillimit Rural, Agron Limani, sot kanë vizituar njërin nga dhjetë blegtorët përfitues të projektit “Ngritja e Stallave për Lopë Qumështore”, me ç’rast panë nga afër punimet që po vazhdojnë për ndërtimin e stallës nga ky blegtor.
Në njoftim, thuhet se me këtë rast, kryetari Haskuka deklaroi se ky nuk është projekti i vetëm për ngritjen e kapaciteteve të blegtorëve që merren me prodhimin e qumështit, ku njoftoi se Komuna e Prizrenit ka bërë edhe subvencionimin e tyre me lopë qumështore.
Duke theksuar se zhvillimi i bujqësisë është një nga shtyllat kryesore të zhvillimit ekonomik, ai tha se mbështetja për bujqit dhe fermerët do të rritet çdo ditë e më shumë.