10-08-2020

Ndahet nga jeta veprimtari i kulturës dhe arsimit nga Zymi i Hasit, Nikollë Kërhanaj

Ka ndërruar jetë në moshën 77 vjeçare, shkrimtari, Nikollë Kërhanaj. Lajmin për vdekjen e tij e kanë bërë të ditur miqtë dhe bashkëpunëtorët e tij, Frrok Kristaj dhe Berat Batiu. Një nga miqtë e tij më të mirë, Frrok Kristaj e ka kujtuar atë përmes një shkrimi në Facebook, ndërsa e ka cilësuar si njeri të ndershëm e arsimtar të devotshëm.Tutje ai shkruan se Kërhanaj ngado që lëvizi la gjurmë në fushën e arsimit e kulturës.

Ndërkaq, nga komuniteti letrar i Prizrenit, Berat Batiu ka shkruar se ” Me pikëllim të thellë, ne komuniteti letrar i Prizrenit, morëm lajmin për vdekjen e kolegut tanë, shkrimtarit, historianit, etnologut dhe mësuesit tonë Nikollë Mark Kërhanaj.

  • Edhe pse për një kohë, nuk ishte në ballë të organizimeve letrare, nuk mund të pajtohemi se në Zymin që e deshe aq shumë, nuk do të takohemi më me njeriun e urtë e të fjalës, që organizoi me dekada Manifestimin Letrar për Gjeçovin, duhet të pajtohemi se nga sot jemi varfëruar shumë nga një pendë, që nuk u ndal asnjëherë.

    Veprimtaria letrare e shkencore e Nikollë Kërhanaj, do të na shërbejë si udhërrëfim të gjithë neve se si duhet të punohet e ruhet e kaluara jonë e lavdishme përmes veprave. Prandaj, ne krijuesit prizrenas, nga sot nuk do ta kemi vetëm fizikisht në mesin tonë, ndërsa krijimet e tij do të jenë në bibliotekat tona dhe të brezave, sepse mësuesi Nikollë ishte i të gjithëve. Madje ishte më shumë i shokëve dhe miqve se sa i familjes.

    Familje e nderuara e krijuesit Nikollë Kërhanaj, ndjehuni krenar për më të dashurin tuaj, i cili nuk ishte vetëm i juaji, por i të gjithë nxënësve, i të gjithë krijuesve, i gjithë hapësirën shqiptare, nga i cili shumë nga ne, i mësuam shkronjat e para dhe rrugën e dijes.

    Të dashur fëmijë, nipa e mbesa, shokë e miq të Nikollë Kërhanajt, dhembja dhe pikëllim që sot e ndjeni për më të dashurin tuaj, të jeni të bindur se edhe neve bashkëpunëtoreve e kolegeve të tij na takon një hise, sepse e kishim në ballë të çdo organizimi.

    Nga sot ju do të mbeteni pa prindër, ndërsa ne pa njeriun që do të na prijë në organizime letrare e shkencore. E vetmja, gjë që na ngushëllon neve, janë shkrimet e tij. Ndërsa për ju, nuk do të jetë më fizikisht, në mesin tuaj, prandaj shprehim ngushëllime në emër të Komunitetit Krijues Prizrenas.

    I lehtë të qoftë dheu i Kosovës, pushofsh në paqe, Nikollë Kërhanaj”, ka shkruar Batiu.

    Kërhanaj u lind në Zym të Hasit më 05 dhjetor 1943. Shkollën fillore e kreu në vendlindje, Normalen në Prizren, ndërsa Fakultetin Filozofik, Dega Gjuhë dhe Letërsi Shqipe në Prishtinë, e duke ia kushtuar më pas tërë jetën arsimit.

    Asnjë koment

    Comments are closed.