Nga drejtimi i rajonit, transferim edhe i Lumni Graishtës
Në shtator të këtij viti, Drejtoria Rajonale e Policisë në Gjakovë u rendit e para ndër tetë drejtoritë rajonale të vlerësuara nga Inspektorati Policor i Kosovës.
Ajo arriti 75.3 për qind të pikëve të mundshme, me notë mesatare 3.76 nga 5.

Edhe Stacioni Policor i Malishevës, pjesë e rajonit të Gjakovës, zuri vendin e parë ndër 41 stacionet e vlerësuara, me 79 për qind të pikëve.
Rezultatet nuk përfaqësojnë një vlerësim individual të Graishtës, por dëshmojnë performancën e strukturës policore që ai drejtonte.
- Edhe raporti zyrtar i Policisë së Kosovës për vitin 2025 evidenton rezultate në fushën e sigurisë publike. Sipas këtij raporti6, gjatë viteve 2023–2025 në Gjakovë dhe Rahovec nuk u regjistrua asnjë vrasje, ndërsa në Malishevë u regjistrua një rast në vitin 2025.
Pikërisht këto rezultate e bëjnë të rëndësishme pyetjen nëse pozita e re do ta shfrytëzojë në mënyrën më të mirë përvojën dhe kapacitetet drejtuese të Graishtës.
Në mesazhin e tij, koloneli ka falënderuar kolegët për bashkëpunimin dhe arritjet e përbashkëta, pa shprehur kundërshtim ndaj vendimit.
mi ka argumentuar se rotacioni i drejtuesve pas një periudhe të gjatë në të njëjtën pozitë mund të jetë i nevojshëm për funksionimin e organizatës.

Sipas Graishtës, qëndrimi për shumë vite në një detyrë mund të krijojë familjarizim me personelin dhe mjedisin e punës, gjë që mund të ndikojë në vendimmarrjen menaxheriale.
Megjithatë, rotacioni dhe shfrytëzimi optimal i burimeve njerëzore janë dy çështje që duhet të vlerësohen së bashku.
Ndërrimi i drejtuesve mund të jetë i arsyeshëm për nevojat e organizatës, por kjo nuk e përjashton nevojën që sistemimi i tyre të mbështetet në përvojën, rezultatet dhe aftësitë profesionale.

Sipas rregullores për organizimin dhe sistematizimin e vendeve të punës në Policinë e Kosovës, drejtori rajonal ka përgjegjësi të drejtpërdrejta në mbikëqyrjen e personelit dhe drejtimin e punës në rajon.
Ndërkohë, kompetencat konkrete që Graishta do të ushtrojë në pozitën e këshilltarit në Ferizaj nuk janë sqaruar në informacionet e bëra publike.

Për këtë arsye, nuk mund të përcaktohet ende nëse sistemimi i tij përfaqëson një shfrytëzim më të mirë të përvojës apo një kufizim të përgjegjësive të tij menaxheriale.
Çështja nuk është nëse Graishta duhej të mbetej përgjithmonë drejtor në Gjakovë, por nëse menaxhmenti i Policisë ka zgjedhur pozitën ku përvoja dhe rezultatet e tij mund t’i shërbejnë më së miri institucionit.
Një përgjigje e qartë për këtë do të kërkonte publikimin e kritereve të sistemimit dhe sqarimin e përgjegjësive të pozitës së re.
Deri atëherë, transferimi i drejtuesit të rajonit policor më të vlerësuar në vend mbetet një vendim që meriton shpjegim institucional.

