Një kompani italiane interesohet për investime në bujqësi në Suharekë e Rahovec.

Kryetari i Komunës së Suharekës  Bali Muharremaj, ka pritur sot në një takim përfaqësuesin e Kompanisë italiane AZ.AGR.Giallograno S.S, Glauco San Giovanni, i cili shoqërohej nga zv.ministri i bujqësisë Vesel Krasniqin.

Në njoftimin për opinion, thuhet se në  këtë takim u bisedua për interesimin e kësaj kompanie italiane për të investuar në sektorin e bujqësisë në këtë komunë.

Kompania italiane po kërkon realizimin e një projekti që ka të bëjë me mbjelljen e disa llojeve të bimëve, shumë fitim prurëse, për çka sqarime më detale ka dhënë zv.ministri Krasniqi, i cili citohet të ketë thënë se “këto prodhime janë të përshtatshme për vendin tonë, klima është e mirë dhe Suhareka ka tokë që i përshtatet”.

Kompania është e interesuar për mbjelljen e 6.000 fidaneve  në një hektarë, ndërsa nga një fidane brenda vitit, bima ka 1 kg vitin e parë, ndërsa në të dytin 2,5 kg, që do të thotë se janë fitimprurëse”.

Kryetari Muharremaj, ka thënë se komuna  do t’i ofrojë mbështetje kompanisë dhe do të gjejë fermerët që janë të interesuar për mbjelljen e këtyre bimëve.

Për të  parë kushtet dhe interesimin e bujqve të atjeshëm, afaristët italianë, sot kanë  qëndruar edhe në Rahovec.

Kryetari i Komunës, Smajl Latifi, gjatë takimit u ka thënë biznesmenëve italian, se si institucione komunale janë të gatshëm për bashkëpunim në sektorin e bujqësisë dhe në sektor të tjerë, që shihen të arsyeshëm të bashkëpunojmë .

Një ditë më parë, afaristët nga Italia  kanë qëndruar edhe në Malishevë./GazetaePrizrenit.net/