Më 25 janar, Gazeta Sinjali raportoi ekskluzivisht për përfshirjen në një përleshje të Rionit Hamitit, djali i zyrtarit policor në Prizren, Halim Hamiti, i cili shpëtoi nga ndjekja penale pasi u intervistua vetëm si dëshmitar. Rastit i është dhënë epilogu me dënimin e personit që u arrestua dhe u akuzua për incidentin, teksa djali i policit ‘fitoi’. Pamjet që i publikoi Sinjali dyshohet se i ka pasur në duar Policia në Prizren, por që i ka fshehur nga Prokuroria.

Pas publikimit të pamjeve nga Sinjali, hetuesit e Inspektoratit Policor janë vënë në lëvizje dhe së paku dy herë kanë qenë në Drejtorinë Rajonale të Policisë në Prizren për të mbledhur informacionet e nevojshme që zbardhin rrethanat e asaj që ka ndodhur.

Edhe nga IPK e kanë konfirmuar se ka filluar një hetim preliminar lidhur me këtë rast.

“Duke ju referuar kërkesës suaj, Inspektorati Policor i Kosovës ju konfirmon se ka filluar hetim preliminar lidhur me këtë çështje në koordinim me Prokurorinë Themelore në Prizren.” – thuhet në përgjigjen e IPK-së për Sinjalin.

Sinjalizues të Gazetës Sinjali kanë bërë me dije se ndaj Rion Hamiti është kërkuar që të mos iniciohet rast vitin e kaluar, kur edhe ka ndodhur përleshja, jo sepse nuk ka pasur elemente të veprës penale, por, sipas tyre, për shkak se është djali i policit.

Ky i fundit po dyshohet se ndikoi në këtë rast, duke ndërhyrë që i biri të intervistohej si dëshmitar dhe jo si i dyshuar, pa e dëshmuar përfshirjen ose jo të tij në sherrin që plasi mes disa të rinjve më 16 korrik 2023.

Ndryshe, Rion Hamiti ka aplikuar për t’u bërë pjesë e Policisë së Kosovës dhe të hënën e kaluar ka nisur trajnimin në Akademinë e Kosovës për Siguri Publike në Vushtrri.

Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.