Portugalia e Ronaldos sfidon mbrojtjen e pathyeshme uruguaiane

Shumë të përbashkëta kanë Uruguai e Portugalia, që takohen ndërmjet vete të shtunën mbrëma (20:00) në Sochi, në ndeshjen e dytë të 1\8 së finales të botërorit “Rusia 2018”.

Janë skuadra pragmatike, të tilla që vështirë mposhten, në fushë udhëhiqen nga sulmues me nam, ndërsa nga bankina nga trajnerë veteranë. Në fakt pak ekipe kanë kaq shumë të përbashkëta sa Uruguai e Portugalia.

Ndeshja mund të mos jetë një festë golash, por prapë premton të jetë një betejë fascinuese. Uruguai ka fituar tri ndeshjet në grup, por nuk ka shkëlqyer në të gjitha, ndërsa është ekipi i vetëm që nuk ka pësuar gol në këtë botëror.

Portugalia kaloi grupin me barazimet ndaj Spanjës dhe Iranit dhe me fitoren me fat ndaj Marokut. Por kjo nuk pritet ta shqetësojë përzgjedhësin Fernando Santos, që nuk ka asgjë kundër që skuadra e tij të arrijë rezultatin e synuar edhe nëse nuk paraqitet mirë.

Santos 63 vjeç është në botërorin e tij të dytë. Ka drejtuar Greqinë në 16 më të mirat katër vjet më parë. Dy vjet më parë udhëhoqi Portugalinë drejt titullit të Evropës./koha.net/