Prizreni ende pa nënkryetar për komunitete

Kryetari i Komunës së Prizrenit, Mytaher Haskuka, ende nuk e ka paraqitur para Kuvendit të Komunës propozimin e tij për nënkryetarin nga radhët e komuniteteve.

Nëntë muaj më parë ai ka emëruar drejtorët e Ekzekutivit, ndërkohë që posti i nënkryetarit për komunitete ka mbetur i zbrazët.

Përderisa përfaqësues të partive të komuniteteve jo-shumicë kanë bërë thirrje që kjo çështje të kryhet në afatin sa më të shpejtë kohor, këshilltarët e opozitës kanë kritikuar Qeverinë komunale për zvarritjet në këtë drejtim.

Mirëpo kryetari i Komunës së Prizrenit, Mytaher Haskuka, ka pohuar se partitë e komuniteteve jo-shumicë kanë mospajtime në këtë drejtim dhe se është në konsulta me ta për gjetjen e një zgjidhjeje të shpejtë./koha.net