Prizreni është në atmosferë solemne për nder të festës kombëtare të 28 Nëntorit.

Qyteti është stolisur më flamuj kombëtarë dhe shtetërorë dhe të vendeve mike.

Sot në orën 11:00, përballë objektit të Komunës së Prizrenit, afër Lumbardhit mbahet ceremonia solemne e përurimit të shtatores së heroit, Agim A. Shala.

Në orën 19:00, në sheshin “Shatërvan”, do të mbahet koncerti festiv.

Dita e 28 nëntorit e emërtuar si Festa e Flamurit është një nga më të veçantat për shqiptarët në krejt botën, për arsye të shumta, ndër vite e shekuj.

Ngjarja tjetër e madhe që pason këtë datë, është ndoshta më me peshë për shqiptarët, pasi aty i gjejmë fillet e një kombi që hyn ndruajtshëm, por i mëvetësuar, në shekullin e njëzetë.

Më 28 nëntor të vitit 1912 Kuvendi Kombëtar i Vlorës, pjesë e të cilit ishin liderët shqiptarë të gati të gjitha krahinave, shpalli Shqipërinë shtet më vete, pas së cilit akt Ismail Qemali, kryetar i tij, ngriti flamurin kuqezi.

Kj0 datë shënon edhe ditëlindjen e një prej kolosëve të kombit, angazhimi dhe sakrifica e të cilit janë në themel të luftës së fundit për çlirim të shqiptarëve të Kosovës. Adem Jashari me flijimin e vet dhe të krejt familjes do të bëhej inspirim i pashoq për ushtarët e Ushtrisë Çlirimtare të Kosovës që kishin bërë daljen publike më 28 nëntor të vitit 1997, deri në çlirimin e Kosovës nga pushtimi serb.

Portali “Gazeta e Prizrenit” ua uron të gjithë shqiptarëve 28 Nëntorin!