Brenda dhjetë minutave, Policia në Suharekë mbrëmë ka intervenuar në katër raste ku ka hasur në grumbullim të qytetarëve dhe hapje të lokaleve në mënyrë të jashtëligjshme.

Sipas policisë, qytetarët janë shpërndarë në katër raste të ndara ndërsa pronarët e lokaleve janë intervistuar dhe me vendim të prokurorit të njëjtit janë liruar në procedurë të rregullt.

Ndaj pronarëve të lokaleve është hapur rast për mosveprim sipas dispozitave shëndetësore gjatë epidemisë.

Dy raste kanë ndodhur në rrugën “Hasan Prishtina”, një në rrugën “Brigada 123” dhe një në rrugën “Ali Pashë Tepelena”.

Kujtojmë se në fazën e dytë u hapën kafiteritë vetëm për ofrimin e shërbimit “merre-me-vete”.

Qytetarët mund të marrin me vete porositë, pasi ende nuk lejohet qëndrimi brenda objekteve, kjo si shkak i parandalimit të përhapjes së Covid-19.