Komuna e Rahovecit në bashkëpunim me OVL e UÇK-së dega në Rahovec kanë organizuar sot, aktivitete të shumta në nderim jetës dhe veprës së dëshmorëve të Kombit: Xhelal Hajda-Toni, Selajdin Mullabazi-Mici nga Rahoveci, Hamdi Hajrizi, Bektesh Haliti dhe Nezir Imeri nga Vushtrria.

Aktivitetet në shënimin e 21 vjetorit të rënies së dëshmorëve kanë filluar me nderime dhe homazhe te vendi i rënies tek udhëkryqi mbi fshatin Opterushë dhe fillimi i ndërtimit të kullës prej guri, për nder të dy heronjve Xhelal Hajda-Toni dhe Selajdin Mullabazi-Mici, për të vazhduar me homazhe te Lapidari i heronjve, Xhelal Hajda-Toni, Selajdin Mullabazi-Mici dhe shënimi i ditës së Shkollës së Mesme të Lartë  “Xhelal Hajda-Toni” aktivitet ky që është mbajtur në Shtëpinë e Kuturës “Mensur Zyberaj”, Rahovec.

Në aktivitetet ka marrë pjesë edhe kryetari i komunës së Rahovecit, Smajl Latifi me bashkëpunëtor, familjar dhe bashkëluftëtar të dëshmorëve.

“Emri i tyre është kalitur në çdo mendje e në çdo zemër me një krenari të pamasë. Emrat e tyre sot gëzojnë rrugët e më e mira e kësaj gëzojnë shkollat-vatrat e kulturës e arsimit, nga ku buron dija e bashkë me to buron dashuria për atdheun siç edhe e kishin ata. E ardhmja ndërtohet çdo ditë dhe përkushtimi ynë duhet të bazohet mbi këto flijime të mëdha. Dëshmorët që po i kujtojmë sot na tregojnë se përjetësia u takon atyre, ndërsa neve na mbetet të punojmë pa u ankuar e pa u ligështuar, ngase jeta nuk ka çmim”, ka thënë ndër të tjera kryetari Latifi, thuhet ne njoftimin e komunës të Rahovecit.  /GazetaePrizrenit.net/