Lodhja nga nxehtësia mund të shkaktojë marramendje, dhimbje koke, dridhje dhe etje të fortë. Edhe pse zakonisht nuk është gjendje e rëndë, ajo kërkon ftohje të menjëhershme të trupit brenda 30 minutash.

Forma më e rrezikshme është goditja nga nxehtësia, kur temperatura e trupit kalon mbi 40.6°C. Kjo gjendje përbën emergjencë mjekësore dhe mund të shkaktojë dëmtime të organeve ose edhe vdekje. Simptomat përfshijnë konfuzion, frymëmarrje të shpejtë, kriza dhe të përziera.

Sipas të dhënave ndërkombëtare, qindra mijëra vdekje në vit lidhen me nxehtësinë e tepërt, ndërsa studimet në Evropë tregojnë se ndryshimet klimatike kanë rritur ndjeshëm numrin e viktimave gjatë valëve të të nxehtit.

Ekspertët theksojnë se më të rrezikuar janë foshnjat, të moshuarit, personat me sëmundje kronike si diabeti dhe sëmundjet kardiovaskulare, si dhe ata që punojnë në ambiente të ekspozuara ndaj diellit apo në kushte të rënda pune.

Ndikimet e nxehtësisë nuk kufizohen vetëm në temperaturën e trupit. Ndotja e ajrit dhe tymi nga zjarret mund të shkaktojnë inflamacion dhe dëmtime të indeve, ndërsa tek gratë shtatzëna rritet rreziku për lindje të parakohshme dhe peshë të ulët të foshnjës.

Autoritetet shëndetësore në disa vende evropiane kanë lëshuar këshilla për qytetarët, duke rekomanduar pushime të shpeshta, veshje të lehta, qëndrimin në hije dhe kontrollin e personave të moshuar gjatë valëve të të nxehtit.

Ekspertët paralajmërojnë se goditja nga nxehtësia është urgjencë mjekësore dhe kërkon ndërhyrje të menjëhershme për të shpëtuar jetën e pacientit.