I dyshuari për tentim vrasje në fshatin Lubizhdë të Prizrenit, është vetëdorëzuar në polici.

“I dyshuari është vetëdorëzuar në polici, pasi ka qenë në arrati ku edhe e ka dorëzuar një pistoletë me karikator të zbrazët”, njofton Policia e Kosovës.

Lidhur me rastin është njoftuar prokurori kujdestar, i cili ka urdhëruar që i dyshuari të dërgohet në mbajtje.

Dy ditë më parë, rreth orës 18:53 minuta, në magjistrale të fshatit Lubizhdë,pati ndodhur një tentativë për vrasje dhe shkaktim i rrezikut të përgjithshëm për pjesëmarrësit në komunikacion, shkruan prizrenpress.

Sipas raporteve hetimore thuhet se i dyshuari B. K. po lëvizte me automjet ‘Audi A 3’ nga Prizreni në drejtim të Suharekës, pasi e ka vërejtur veturën e viktimave që lëvizte nga krahu i kundërt, një Audi A 5, në të cilën ndodheshin shoferi dhe dy bashkudhëtarë ka ndalur veturën e tij, ka dalë prej saj dhe ka shtënë disa herë me pistoletë në drejtim të tyre, me ç’rast një plumb ia ka shpërthyer gomën. I dyshuari më pas është larguar në drejtim të panjohur.

Policia ka kryer hetime në vendin e ngjarjes; janë sekuestruar katër gëzhoja dhe një predhë plumbi. Ndërkohë është identifikuar i dyshuari e më pas është kryer një bastisje në shtëpinë e tij, por nuk është gjetur për t’u arrestuar.