Aksioni në Veri: Detaje nga Prokuroria Speciale për arrestimet dhe sekuestrimet
Prokuroria Speciale e Kosovës ka dhënë detaje për aksionin në veri të vendit, ku tha se u kryen kontrolle në 11 lokacione nga dogana e që është mbështetur prej policisë, ku janë arrestuar nëntë zyrtarë e është sekuestruar armatim, telefona e plomba.
Sipas Prokurorisë Speciale, kontrolli është bërë me qëllim të mbledhjes së provave dhe ndalimit të nëntë zyrtarëve për veprat penale “keqpërdorim i pozitës apo autoritetit zyrtar” dhe “marrja e ryshfetit”.
Gjatë këtij aksioni janë grumbulluar prova që mbështesin dyshimin se këta nëntë (9) zyrtarë, tetë (8) nga të cilët janë zyrtar të Doganës dhe një (1) zyrtar policor nga Policia kufitare, kanë qenë të përfshirë në veprat për të cilat dyshohen.
Po ashtu, nga ky aksion janë sekuestruar sende tjera të rëndësishme për procedurë të mëtutjeshme hetimore si:
Njëzet (20) plomba zyrtare të Doganës së Kosovës
Dhjetë (10) telefon së bashku me katër (4) sim kartela
Një pistoletë e kalibrit 9 mm me tre karikator dhe 9 fishek, me leje
Gjashtëmbëdhjetë (16) copë municion jo zyrtar.
