Një shtetas i Kosovës, me inicialet F.S., është arrestuar në pikën kufitare në Merdare të Podujevës, nën dyshimin për kryerjen e veprës penale “Spiunazh”.

Sipas Prokurorisë Speciale të Republikës së Kosovës, arrestimi është kryer me urdhër të saj nga hetuesit policorë të Drejtorisë për Hetimin e Krimit të Organizuar dhe Krimeve të Rënda.

Arrestimi ka ardhur pas veprimeve hetimore të ndërmarra nga autoritetet kompetente.

Prokuroria Speciale, në bashkëpunim me Policinë e Kosovës, ka bërë të ditur se do të vazhdojë me veprimet e nevojshme hetimore për zbardhjen e plotë të rrethanave të rastit.

Institucionet kanë theksuar përkushtimin për luftimin dhe ndjekjen penale të personave për të cilët ekzistojnë dyshime të bazuara për përfshirje në veprimtari të kundërligjshme, veçanërisht në raste që cenojnë sigurinë kombëtare.