Arrestohet vëllai i Lavdrim Muhaxherit, Policia i gjen mbi 160 mijë euro, franga e dollarë
Policia e Kosovës ka arrestuar një person në Ferizaj për tregti të ndaluar dhe kontrabandë me mallra, ndërkaq gjatë kontrollit të shtëpisë së tij i janë gjetur mbi 160 mijë euro, pastaj franga zvicerane dhe dollar amerikan.
Të dyshuarit i janë gjetur edhe 696 kilogramë mjaltë pa prejardhje dhe 250 kilogramë fasule.
I arrestuari është Bajram Muhaxheri, vëllai i ish-pjesëtarit të ISIS-it nga Kosova, Lavdrim Muhaxheri, i cili u vra në Siri.
“Hetuesit policorë nga Njësia Rajonale për Hetimin e Krimeve Ekonomike dhe Korrupsion (NjRHKEK) Ferizaj, kanë trajtuar një informatë për një person të dyshuar. Personi, për policinë ka qenë edhe më parë i njohur për përfshirje në veprimtari penale. Gjatë trajtimit të rastit, policia në koordinim me prokurorinë, kanë kryer kontrolle në shtëpinë e të dyshuarit B.M., (viti i lindjes 1990, mashkull kosovar).
Gjatë kontrollit të shtëpisë, policia ka gjetur:
161.485 euro (njëqind e gjashtëdhjetë e njëmijë e katërqind e tetëdhjetë e pesë euro),
2320 franga zvicerane (dymijë e treqind e njëzet franga zvicerane),
2300 dollar amerikan (dymijë e treqind dollar amerikan),
80.850 denar maqedonas (tetëdhjetëmijë e tetëqind e pesëdhjetë denar maqedonas),
696 kilogramë mjaltë (produkt i dyshimtë pa prejardhje),
250 kilogramë fasule (pa prejardhje)
Një pushkë e gjatë (pushkë ajrore)
Një revole,
Një veturë dhe
Një telefon.
Për rastin me mallin e kontrabandë (mjalti dhe fasulja), është ftuar për trajtim njësia e Doganës së Kosovës.
Ndaj të dyshuarit është iniciuar rasti, nën dyshim për përfshirje në veprat penale: ‘tregti e ndaluar’ dhe ‘kontrabanda e mallrave’.
Pas intervistimit në prezencë të avokatit mbrojtës, me aktvendim nga prokurori kompetent, i dyshuari dërgohet në ndalim prej 48 orësh.
