Dragashi s’u dekorua kurrë për festat e fundvitit, ja çfarë thotë kryetari
Tashmë në gjithë botën po ndjehet një atmosferë festive.
Në vigjilje të festave të fundvitit, sheshe, qytete madje edhe fshatra janë ndriçuar e stolisur, por edhe këtë vit Dragashi vazhdon të mbetet pa asnjë frymë feste.
Qytetarët e kësaj komune, ashtu si edhe viteve të tjera, do të detyrohen të shkojnë në qytetet e afërta, apo këtë atmosferë ta shijojnë vetëm përmes imazheve.
Në një përgjigje për Indeksonline, kryetari i Dragashit, Shaban Shabani, mos dekorimin e qytetit për këtë vit e arsyeton për mungesë e mjeteve financiare.
“Këtë vit nuk do te dekorohet Dragashi! Arsye e mos dekorimit është se nuk ka qenë e planifikuar më herët për shkak të mungesës së mjeteve. Komuna në kalendarin e aktiviteteve nuk ka parashikuar aktivitete për festat e fundvitit”, ka thënë Shabani.
Megjithatë qyteti i Dragashit, nuk është dekoruar kurrë për festat e fundvitit.
Kujtojmë që as qyteti më i madh afër Dragashit, Prizreni, ka mbetur pa atmosferë festive, e kjo pasi që gjatë procedurave tenderuese operatorët ekonomikë kanë bërë gabime të patejkalueshme ligjore dhe rrjedhimisht Komuna është obliguar që ta bëjë anulimin e tenderit./Indeksonline
