Muharremaj punësoi vëllain e drejtorit të Arsimit si drejtor shkolle
Dhjetë ditë pas përfundimit të afatit ligjor për ankesa të kandidatëve për pozitën e drejtorit të Shkollës së Mesme Teknike “Skënder Luarasi”, kryetari i Suharekës, Bali Muharremaj nënshkroi vendimin për pranim në marrëdhënie pune të Hamdi Bytyqit, i cili është vëllai i drejtorit të Arsimit, Remzi Bytyqi.
KALLXO.com kishte kontaktuar me kryetarin e komunës së Suharekës, Bali Muharremaj, i cili kishte thënë se pavarësisht lidhjes familjare mes këtij kandidati dhe drejtorit të Arsimit, ky punësim nuk paraqiste konflikt të interesit.
Por drejtori i Arsimit, Remzi Bytyqi kishte thënë për KALLXO.com se “ndoshta është” konflikt i interesit punësimi i të vëllait në pozitën e drejtorit të Shkollës së Mesme Teknike, mirëpo siç kishte deklaruar ai, pranimi në punë arsyetohej me përvojën që posedon Hamdi Bytyqi.
Ndërkaq, vetë i punësuari, Hamdi Bytyqi tha për KALLXO.com se mendon që “është pak” konflikt interesi dhe se punësimi i tij në pozitën e drejtorit të shkollës “Skënder Luarasi” është “njëfarë defekti”.
KALLXO.com kishte shkruar për njoftimin përmes të cilit vëllai i drejtorit të Drejtorisë së Arsimit në Suharekë është zgjedhur drejtor i kësaj shkolle.
