Klubi i Çiklistëve “Pro Bike Prizren” i ka bërë thirrje çiklistëve dhe ngasësve të automjeteve që të shtojnë kujdesin në rrugët e Prizrenit për shkak të trafikut të dendur gjatë ditëve të verës.

Sipas këtij klubi, numri i madh i automjeteve mund të përbëjë rrezik për sigurinë e çiklistëve në rrugët e Prizrenit, dhe për këtë arsye është apeluar që secili pjesëmarrës në trafikun rrugor të kontribuojë për lëvizje të sigurt.

“Ju sugjerojmë të evitoni daljen me biçikletë deri më 20 gusht 2024 për të minimizuar rrezikun. Nëse është e domosdoshme të dilni, ju lutemi të keni shumë më shumë kujdes gjatë ngasjes së biçikletës; Përdorni helmetë dhe drita të dukshme për t’u siguruar që jeni të dukshëm për drejtuesit e automjeteve; Mbani distancën e duhur dhe ndiqni rregullat e trafikut për sigurinë tuaj dhe të të tjerëve”.

Ngjashëm janë adresuar edhe disa rekomandime për drejtuesit e automjeteve, duke sugjeruar respektimin e çiklistëve në trafik, raporton Telegrafi.

“Ne ju bëjmë thirrje të përdorni biçikletën sa më shumë të jetë e mundur për punët tuaja të përditshme. Kjo do të ndihmojë në reduktimin e trafikut dhe rritjen e sigurisë për të gjithë; Respektoni çiklistët në rrugë dhe tregoni kujdes të veçantë në afërsi të tyre; Shmangni përdorimin e panevojshëm të automjeteve dhe zgjidhni mënyra alternative të lëvizjes për të kontribuar në një mjedis më të sigurt dhe më të qëndrueshëm”.