Prokuroria e Prizrenit po heton konkursin për sekretarë të shkollave në Komunën e Prizrenit.

Sipas Prokurorisë në Prizren, anëtarët e komisionit të këtij konkursi po hetohen për veprën penale “Keqpërdorimi i pozitës apo autoritetit zyrtar”.

“Referuar kërkesës tuaj për informacione, ju njoftojmë se rasti në fjalë është duke u trajtuar nga Prokuroria Themelore në Prizren në drejtim të veprës penale “Keqpërdorimi i pozitës apo autoritetit zyrtar” nga neni 414 të Kodit Penal të Republikës së Kosovës (KPRK). Për rrjedhën e mëtutjeshme të rastit do të njoftoheni me kohë”- ka konfirmuar Fitore Mehmeti- Sejrani, zyrtare për Informim dhe Monitorim të Mediave në Prokurorinë e Prizrenit.

“Është mbajtur testi me shkrim,  Është mbajtur intervista me gojë. Sipas informacioneve të Kryetares së Komisionit Përzgjedhës për këtë procedurë, procesi i  kësaj procedure është në fazën e përgatitjes së rezultateve përfundimtare, ku në fund të kësaj procedure  merret vendim për përzgjedhjen e kandidatëve më të suksesshëm duke u bazuar në vendimin e tyre, Njësia e Burimeve Njerëzore publikon rezultatet në web-faqen e komunës”, thuhet në përgjigjen e Komunës së Prizrenit të datës 31 gusht.

Lexo edhe:

Prizren: Detaje, VV dorëzon kallëzim penal ndaj Totajt dhe zyrtarëve arsimor

Konkursi për këto pozita pune ishte hapur në muajin maj të këtij viti, ndërsa janë shpallur 9 pozita të lira në nëntë shkolla të komunës së Prizrenit.

Sipas njoftimit të komunës së Prizrenit, në këtë konkurs kanë plotësuar kriteret 121 kandidatë nga 207 sa kishin aplikuar.