Sipas përshkrimit të gjykatës, i akuzuari kishte dalë përballë tyre me automjet, kishte zbritur dhe kishte shtënë me armë automatike në drejtim të B.M., duke e goditur në pjesën e përparme të trupit. Pasi viktima ishte rrëzuar në tokë, A.G. i ishte afruar dhe kishte shtënë përsëri në drejtim të kokës së tij.

Si pasojë e plagëve të marra, B.M. kishte vdekur në vendin e ngjarjes. Ndërkohë, bashkëshortja dhe vajza e viktimës kishin qëndruar pranë tij, ndërsa dy personat e tjerë kishin arritur të fshiheshin nga i akuzuari, i cili më pas ishte larguar nga vendi i ngjarjes.

Gjykata ka konstatuar se, me këto veprime, A.G. kishte rrezikuar me dashje edhe jetën e katër personave të tjerë. Për këtë arsye, ai është shpallur fajtor për veprën penale “Vrasja e rëndë”, sipas nenit 173, paragrafi 1, pika 1.5, të Kodit Penal të Republikës së Kosovës.

Trupi gjykues, i kryesuar nga Sadije Selmani, me anëtarët Ajser Skenderi dhe Artan Sejrani, i ka shqiptuar të akuzuarit dënim me burgim në kohëzgjatje prej 30 vjetësh. Gjithashtu, gjykata ka vendosur vazhdimin e masës së paraburgimit ndaj tij deri në plotfuqishmërinë e aktgjykimit.

Pas shpalljes së vendimit, palët janë njoftuar se aktgjykimin e plotë, në formë të shkruar dhe të arsyetuar, do ta pranojnë brenda afatit ligjor.

Gjykata ka bërë të ditur se, lidhur me të njëjtën ngjarje, më 16 maj 2024, A.G. ishte shpallur fajtor edhe për dy vepra të tjera penale: mbajtjen në pronësi, kontroll ose posedim të paautorizuar të armëve dhe asgjësimin apo dëmtimin e pasurisë. Për këto vepra, atij i ishte shqiptuar dënim me burgim prej një viti dhe gjobë prej 500 eurosh.