Rastet e dhunimit në Kosovë, janë bërë dukuri shqetësuese vitet e fundit. Vetëm gjatë vitit 2021, në Policinë e Kosovës (PK) janë raportuar 102 raste të veprës penale “Dhunimi”.

Kështu është bërë e ditur në një përgjigje nga Policia e Kosovës, dhënë për “Betimi për Drejtësi”.

Sipas policisë, në këtë numër të rasteve të raportuara, hyjnë të gjitha grupmoshat dhe pa dallime gjinore.

“Policia e Kosovës trajton  me seriozitet të lartë të gjitha rastet duke përfshirë edhe rastet e dhunës seksuale. Ndër vite, policia ka realizuar edhe fushata vetëdijësuese me qëllim të inkurajimit të viktimave për të  raportuar të gjitha rastet, veçanërisht rastet e ndjeshme si dhuna seksuale, dhuna në familje etj, e që përveç punëve operacionale gjithashtu objektiv i Policisë ka qenë parandalimi dhe reduktimi i rasteve të tilla”, thuhet në përgjigjen e Policisë.

Ndryshe, rasti i fundit ku një 11-vjeçare dyshohet se u dhunua nga pesë persona, ka nxitur reagime të shumta, ndërsa kërkohet dënim meritor për kryerësit e kësaj vepre penale.

Lidhur me dhunimin e të miturës janë arrestuar pesë të dyshuarit, katër prej të cilëve iu është caktuar masa e paraburgimit. /BetimipërDrejtësi