Aplikoi 66 herë për një vend pune – Babai rrëfen se si vajza mori rrugën për mërgim pasi nuk u punësua në Kosovë
Mimoza Kastrati është mësuesja për të cilën nuk ka pasur vend të punës në Kosovë dhe kjo jo për shkak të përgatitjes së saj profesionale.
E reja nga Malisheva ka përfunduar studimet në Fakultetin e Edukimit dhe rrjedh nga një familje akademikësh.
Pasi përfundoi studimet, Mimoza aplikoi jo një herë, e as dy, por rrumbullak 66 herë për punësim si mësimdhënëse, raporton Indeksonline.
Në një intervistë për Indeksonline, babai i Mimozës, Sahiti, ka thënë se si vajza e tij është zhgënjyer dhe i është dashur të shkojë në mërgim.
“Si familje jemi të thyer në zemër sepse nuk i kemi përgatitë fëmijët për gurbet. Nuk i kemi përgatitë fëmijët me ikë nga atdheu, por me punu në atdhe dhe për atdhe. Fatkeqësisht, Mimoza u mërzit!”, ka thënë mes të tjerash Sahiti.
Sipas tij, Mimoza është një vajzë e dashur, me shumë vullnet dhe dashuri për mësimdhënien dhe nxënësit.
“Mimoza vërtet u maltretu për tri vite. Në këto tri vite me radhë, 66 herë ka shku nëpër intervista, duke apliku në tri komuna: Malishevë, Drenas e Klinë. I ka ra 66 herë me u intervistu. Neve na ka bë faqebardhë sepse çdo herë, në testim me shkrim, ka dalë e para”, shtoi Kastrati.
Ai tha se për herë të fundit, Mimoza shkoi për intervistë në Fushë-Kosovë, por që as aty nuk u pranua. Kjo gjë e ka demoralizuar më së shumti të bijën e tij.
Më poshtë mund të ndiqni rrëfimin e plotë të tij.
