Arrestohen dy të dyshuar për organizim lojërash të fatit, në Prizren

Policia e Kosovës, konkretisht Njësia Kundër Krimeve Ekonomike dhe Korrupsionit në rajonin e Prizrenit, pas marrjes së informacioneve relevante për zhvillimin e veprimtarive të kundërligjshme që ndërlidhen me lojërat e fatit, vikendin që po lëmë pas ka ndërmarrë disa veprime policore.

Në dy lokacione të ndryshme në rajonin e Prizrenit janë realizuar kontrolle të lokaleve, ku janë arrestuar dy persona të dyshuar si edhe janë sekuestruar dëshmi të ndryshme.

Në rastin e parë në Prizren është arrestuar një i dyshuar mashkull, pasi që ai në lokalin e tij kishte organizuar lojëra të fatit. Janë sekuestruar katër aparate dhe 1406.5 euro para të gatshme.

Ndërsa, në rastin e dytë në Dragash është arrestuar i dyshuari mashkull, pasi që ai në lokalin e tij kishte organizuar lojëra të fatit. Janë sekuestruar dy aparate, dy shtëpiza kompjuteri dhe 2987.85 euro para të gatshme.

Pas realizimit të proceduarve nga policia, janë iniciuar rastet “organizim i skemave dhe bixhozit të paligjshëm” dhe dy të dyshuarit e arrestuar me vendim të prokurorit janë dërguar në mbajtje.

Policia e Kosovës thotë se është e përkushtuar në zbatimin e ligjit dhe inkurajon të gjithë qytetarët që çdo informacion lidhur me ndonjë veprimtari të kundërligjshme ta ndajnë me Policinë e Kosovës, në mënyrë që në bashkëpunim të reduktohen apo të ndalohen veprimtaritë e tilla.