28-09-2020

Minxhozi: Shqipëria e Kosova synojnë liberalizim të procedurave në kufi sipas kritereve të BE-së

Shqipëria synon që me Kosovën të ketë liberalizim të procedurave në kufi mirëpo gjithnjë në përputhje me standardet e Bashkimit Evropian (BE), në mënyrë që të mos dëmtohet procesi i liberalizimit të vizave për këtë të fundit.

Kështu deklaroi Ambasadori i Shqipërisë në Kosovë, Qemal Minxhozi pas miratimit të rezolutës për heqjen e tërësishme të kontrollit të shtetasve të Kosovës dhe të Shqipërisë në hyrje/dalje, nëpër pikat e kalimit kufitar në Vërmicë, në Qafë Prush dhe në Qafë Morinë, raporton Ekonomia Online.

Miratimi i kësaj rezolute nga njohësit e integrimeve evropiane është cilësuar në kundërshtim me rekomandimin e vitit 2015, të Komisionit Evropian, por Minxozit thotë se s’do të lejojnë që heqja e kontrollit në kufi të dëmtoj procesin e liberalizimit për Kosovën.

“Ajo që ne synojmë është që të kemi një liberalizim të mëtejshëm të procedurave në kufi pa prishur standardet e Bashkimit Evropian që kërkohen për Kosovën në procesin e liberalizimit të vizave”, tha Minxhozi.

Në të njëjtën ditë, Kuvendi ka miratuar edhe Rezolutën për heqjen e tarifave të roaming-ut në telekomunikim ndërmjet Kosovës dhe Shqipërisë, rezolutë kjo e cila, sipas Minxhozit do të ndikojë në zhvillimin e të dy vendeve.

Sipas tij, asnjë rezolutë e nxjerrë nga parlamenti nuk është e dëmshme për proceset në të cilat një vend kalon.

Kreu i ambasadës shqiptare ka folur njëherësh edhe për mbledhjet mes dy qeverive. Ai tha se këto mbledhje kanë bërë që të rritet “impulsi i punës” në të dy anët e kufirit.

“Këto mbledhje i kanë dhënë një impuls punës dhe kjo shprehet edhe në rezultatet që janë arritur”, tha ai.

Sipas tij, marrëveshjet e arritura kanë ndikuar në rritjen e bashkëpunimit mes dy shteteve në aspektin ekonomik.

Minxhozi ka bërë të ditur se për dallim nga periudha e njëjtë e viti të kaluar, këtë gjashtë mujor është shënuar rritje prej 20% në fushën e shkëmbimeve mes dy vendeve si rritje prej 23 % të prezencës së mallrave të Kosovës në tregun e Shqipërisë.

Asnjë koment

Comments are closed.