Muja dhe të tjerët akuzohen nga prokuroria se kanë keqpërdorur pronat komunale të menaxhuara nga Agjencia Kosovare e Privatizimit.

Në këtë proces maratonik që ka kaluar nga një gjykatë në gjykatën tjetër, tashmë një proces të rigjykimit është duke e zhvilluar Gjykata Themelore në Gjilan, pasi u lexuan provat e administruara në gjykimin e parë të përfunduar në marsin e vitit 2014, palët propozuan disa prova të reja.

Prokurorja e Prokurorisë Speciale Fikrije Fejzullahu, fillimisht i propozoi gjykatës që të merret si provë një aktgjykim i Gjykatës Themelore në Prizren, i 6 korrikut 2017, në të cilin i është aprovuar pjesërisht kërkesëpadia e paditëses Ekonomia Pyjore, në gjykimin në të cilin palë e paditur ishte Kuvendi Komunal i Prizrenit.

Prokurorja e bëri këtë propozim me arsyetimin se ka të bëj me ngastra kadastrale që janë objekt i akuzës së këtij procesi gjyqësor.

Edhe pse ky propozim i prokurores u kundërshtua nga mbrojtësi i Ramadan Mujës, avokati Ruzhdi Berisha, me arsyetimin se ky aktgjykim nuk është i formës së prerë, gjykata e aprovoi propozimin e prokurores.

Një provë tjetër e propozuar që u aprovua nga trupi gjykues i udhëhequr nga gjykatësi Agim Ademi ishte ajo e mbrojtësit të Mujës, avokatit Ruzhdi Beqiri, që si provë të merret aktgjykimi i  Gjykatës Themelore të Prizrenit C.nr.790/06, të 19 shkurtit 2015, me të cilin është vendosur lidhur çështjen kontestuese lidhur me ngastrat kadastrale të cilat janë dhënë në shfrytëzim kompanive të huaja nga Komuna e Prizrenit për përsëritjen e procedurës, dhe sipas avokatit kjo lëndë tashmë është në Gjykatën e Apelit.

Mbrojtësi i Mujës propozoi po ashtu që si provë të merret edhe certifikimi i rezultatit të Komisionit Qendror Zgjedhor të 14 dhjetorit 2007 me të cilin Ramadan Muja ishte zgjedhur për herë të parë kryetar i Komunës për të vërtetuar se nga cila datë kishte filluar punën ai, por një propozim i tillë u refuzua.

Gjykata po ashtu ka aprovuar propozimin e mbrojtësit te të akuzuarit Minir Krasniqi, avokatit Pjetër Përgjokaj që trupi gjykues aktual të bëj shiqimin e drejtpërdrejtë në lëndët e procedurës civile që pretendohet se kanë mbetur të pambaruara apo kanë pasur pengesa në Gjykatën Themelore në Prizrenit, në mungesë të eksperteve.

Propozimi i Përgjokaj u arsyetua nga ai që të vërtetohet pretendimi i prokurorisë që një vendim i Komunës së Prizrenit, që i ndalonte ekspertet e gjeodozisë të merrnin pjesë në seancat gjyqësore si ekspert, për të cilin tash po ngarkohen Ramadan Muja, Minir Krasniqi dhe Abdullah Tejeci.

Ndryshe, para se të bëheshin këto propozime për prova të reja u lexuan mbi 100 prova të shqyrtimit të mëparshëm gjyqësor, në mesin e të cilave vendimi për dhënien e tokës për ndërtim dhe shfrytëzim, më datë 18 qershor 2009, të nënshkruar nga Kryesuesi i Kuvendit, Njazi Kryeziu, vendimi i Kryetarit të Komunës, Ramadan Muja, të datës 24 nëntor 2010, për bartjen e tokës nga Organizata Punuese e Pylltarisë “Sharri”, në Komunën e Prizrenit, fleta poseduese e parcelës në të cilin është ndërtuar shkolla “Gylistan”, në emër të komunës, Kontrata e Kryetarit të Komunës në Prizren dhe Qendrës Edukative “Gylistan”, e datës 11 shkurt 2011 dhe shumë provave të tjera.

Në këto prova kishte edhe prova të atilla si kërkesë nga zyra e Prokurorisë së Qarkut në Prizren drejtuar policisë për të mbledhur informata më 24 qershor 2011, përgjigjja e hetuesit zyrës së Prokurorit të Qarkut në Prizren e 2 shtatorit 2011 ose raporte të ndryshme nga hetuesit policorë drejtuar zyrës së Prokurorisë së Qarkut në Prizren.

Leximi i këtyre provave u bë pas propozimit që bëri prokurorja e PSRK-së, Fikrije Fejzullahu.

“Propozoj që gjatë shqyrtimit gjyqësor të administrohen të gjitha provat që janë administruar në shqyrtimin paraprak e që janë të evidentuar në Aktgjykimin e Gjykatës Themelore në Prizren P.Nr. 171/2013, i datës 13 mars 2014, kjo për faktin se Gjykata e Apelit në raport me këto prova nuk ka dhënë asnjë vërejtje dhe nuk ka udhëzuar asgjë”, ishte propozimi i prokurores.

Seanca e radhës është caktuar për 6 qershor në ora 10:00.

Ndryshe, Prokuroria Speciale Republikës së Kosovës (PSRK) në shkurt 2013, ka ngritur aktakuzë ndaj ish-kryetarit të Komunës së Prizrenit, Ramadan Muja, ish-drejtorit të Drejtorisë për Urbanizëm dhe Planifikim Hapësinor, Sadik Paqarizit dhe ish-drejtorit të Gjeodezisë dhe Kadastrit, Avni Ademaj.

Në aktakuzën e ngritur për shpërdorim të detyrës zyrtare ishin të përfshirë edhe ish-zyrtarët e Komunës së Prizrenit, Abdullah Tejeci, Minir Krasniqi dhe Kadri Ukimeri.

Muja dhe të tjerët akuzohen nga prokuroria se kanë keqpërdorur pronat komunale të menaxhuara nga Agjencia Kosovare e Privatizimit.

Po ashtu, në mesin e pronave bëjnë pjesë edhe dy parcelat ku janë ndërtuar shkolla “Mehmet Akif” dhe fabrika e çokollatës “Kamila” në Prizren, të cilat sipas akuzës nuk kanë kaluar fare përmes Kuvendit Komunal por me vendim direkt të ish kryetarit Muja.

Më 13 mars 2014, pas rreth 30 seancave gjyqësore, Gjykata Themelore në Prizren, ka shpallur aktgjykim dënues për ish-kryetarin Muja dhe të tjerë.

Muja  ishte dënuar me dy vjet burgim me kusht që të mos kryej vepër penale për periudhën tre vjeçare. Ndaj Mujës ishte shqiptuar edhe dënimi plotësues i ndalimit të ushtrimit të funksioneve në administratën publike për 30 muaj.

Gjykata Themelore në Prizren, kishte shpallur aktgjykim dënues edhe ndaj të akuzuarve të tjerë në këtë rast, Paqarizi, Ademaj, Tejeci, Krasniqi dhe Ukimeri, duke iu ndaluar edhe funksionin e tyre në administratën publike për periudha të caktuara kohore.

Gjykata e Apelit kishte anuluar një vendim të tillë dhe kishte kthyer rastin në rigjykim, por me ankesë të prokurorisë rasti ka shkuar në Gjykatë Supreme, ku më pas Supremja kishte vendosur që lëndën sërish ta shqyrtojë Apeli.

Apeli sërish në korrik 2017, ka vendosur që lënda të kthehet në shkallë të parë për rishqyrtim dhe rivendosje, por Gjykata e Themelore në Prizren ka kërkuar që të përjashtohet nga ky rast.

Një kërkesë të tillë ishte bërë me arsyetimin se njëra nga veprat për të cilat akuzohet Ramadan Muja, është kallëzim penal i parashtruar nga Gjykata Themelore në Prizren, për pengimin e punës në gjykatë, me rastin e ndalimit të pjesëmarrjes se ekspertëve – gjeodetëve në seancat gjyqësore, ku  kryetari i gjykatës dhe një gjyqtar janë dëgjuar si dëshmitarë.

Gjykata e Apelit, pas kërkesës së bërë nga kryetari i Gjykatës Themelore të Prizrenit, Ymer Hoxha, me 8 gusht të vitit të kaluar kishte vendosur që rigjykimi ndaj Ramadan Mujës dhe pesë të akuzuarve të tjerë të zhvillohet nga Gjykata Themelore në Gjilan.

Kurse, ndaj Kadri Ukimerit është pushuar procedura penale pasi që i njëjti ka ndërruar jetë./betimiperdrejtesi/