Fshatarët e Vlashnjës dhe Kobajës së Prizrenit ankohen për mungesë rryme prej tri ditësh

Banorët e fshatrave Vlashnjë dhe Kobajë të Prizrenit tash e tri ditë po përballen me mungesë të energjisë elektrike.

Kështu kanë bërë të ditur për Klankosova.tv disa banorë të këtyre dy fshatrave, duke thënë se gjatë këtyre tri ditëve, energjia elektrike ka ardhur disa herë për 2-3 minuta dhe sipas tyre, më pas ka vazhduar gjendja e njëjtë.

Ata gjithashtu kanë thënë se edhe një numri të madh të bizneseve që janë në këtë linjë u janë shkaktuar humbje të mëdha.

Klankosova.tv ka kontaktuar me KEDS ku thonë ndryshe. Sipas përgjigjes nga qendra e thirrjeve ka ndërprerje të herëpashershme të rrymës për shkak siç thanë ata ka pasur disa prishje, për rregullimin e të cilave, thuhet se po punojnë ekipet që janë në terren.