06-10-2022

Kosovë, rreth gjysmë milioni euro pensione për të vdekurit

Buxheti i shtetit po dëmtohet edhe nga ata që nuk janë gjallë.

Ndonëse kanë kaluar më shumë se dy vite prej se kanë vdekur, disa prej tyre vazhdojnë që të llogariten si të gjallë nga Ministria e Financave, Punës dhe Transfereve.

Vetëm gjatë vitit të kaluar, kjo ministri ka ekzekutuar pagesa në vlerë mbi 465 mijë euro për pensione pas vdekjes së përfituesve.

E gjitha, thuhet se ka ndodhur si rezultat i ndërprerjes së lajmërimit të pensionistëve për shkak të rrethanave të krijuara nga pandemia, që nga muaji mars, i vitit 2020.

Kjo është bërë e ditur në raportin e pasqyrës financiare për vitin 2021 të këtij institucioni, të publikuar së fundi nga Zyra Kombëtare e Auditimit.

Sipas këtyre gjetjeve, shumica e këtyre pensioneve ishin ndarë për pensionet bazë, kompensim për persona të verbër, pensione familjare e kategori të tjera.

Përveç nga të vdekurit, buxheti i shtetit po dëmtohet për miliona euro edhe nga përfituesit e më shumë se një pensioni.

Vetëm gjatë 2021-ës për këto kategori janë shpenzuar mbi 1 milion e 200 euro.

Rastet më të shpeshta të përfitimit të më shumë se një pensioni nga skemat pensionale, janë përfituesit që i takojnë kategorisë së TMK-së dhe FSK-së.

Sipas këtij raporti, janë mbi 2 milionë euro të cilat ministria që udhëhiqet nga Hekuran Murati ka paguar pa asnjë bazë të qartë ligjore për skemat pensionale dhe ato sociale.

T7 ka dërguar pyetje në Ministrinë e Financave, Punës dhe Transfereve që të marrë informacione se pse kanë kryer pagesa të tilla, dhe nëse do të ndërmerret ndonjë masë për kthimin e këtyre mjeteve, por të njëjtit nuk kanë kthyer përgjigje.

Asnjë koment

Comments are closed.