Vrasje në tentativë në Rahovec: Burri sulmon me sëpatë familjarët e moshuar, gruaja mbetet e plagosur rëndë në kokë

Një ngjarje e rëndë ka ndodhur mbrëmjen e sotme në Rahovec, ku një person ka sulmuar me sëpatë familjarët e tij, raporton Gazeta Sinjali.

Burimet e Gazetës Sinjali kanë bërë të ditur se 59-vjeçari kishte shkuar në oborrin e dy familjarëve të tij të moshuar, të cilët i kishte sulmuar me sëpatë, duke u shkaktuar lëndime serioze.

Lexo edhe:

Hetime ndaj testit për sekretarë shkollash të Prizrenit

Si pasojë e lëndimeve të marra, 70-vjeçarja dhe 67-vjeçari janë dërguar me urgjencë në Emergjencën e Qendrës Kryesore të Mjekësisë Familjare në Rahovec, prej ku janë transferuar më pas në Spitalin Rajonal në Gjakovë.

Sinjali mëson nga burimet e veta brenda spitalit në Gjakovë, se burri ka pësuar ëndime të lehta në fytyrë, ndërsa gruaja është dërguar atje me lëndime të rënda në kokë. Por pas intervenimit të mjekëve, gjendja e tyre shëndetësore është stabilizuar dhe të njëjtit janë jashtë rrezikut për jetë.

Ndërkohë rasti është denoncuar edhe në Polici, të cilët kanë arritur që ta arrestojnë të dyshuarin dhe të konfiskojnë mjetin që dyshohet se u përdor në ngjarjen e rëndë.

Me urdhër të prokurorit, 59-vjeçari është dërguar në mbajtje për 48 orë dhe i njëjti do të hetohet nën dyshimet për kryerjen e veprës penale ‘Vrasje në tentativë’.

/ Gazeta e Prizrenit /